¹ Бяше же некто от племене левиина, иже поя от дщерей левииных, и имяше ю: ² и зача во чреве и роди мужеский пол. видевше же его лепа, крыша его три месяцы: ³ и понеже не можаху его ктому крыти, взя ему мати его ковчежец ситовый и помаза и клеем и смолою, и вложи отроча в него, и положи его в лучице при реце: ⁴ и наблюдаше сестра его издалеча, да уведает, что будет ему. ⁵ Сниде же дщерь фараонова измытися на реку, и рабыни ея прохождаху при реце. И видевши ковчежец в лучице, пославши рабыню, взя и. ⁶ Отверзши же, видит отроча плачущееся в ковчежце, и пощаде е дщерь фараоня, и рече: от детей еврейских сие. ⁷ И рече сестра его дщери фараонове: хощеши ли, призову ти жену кормилицу от еврей, и воздоит ти отроча? ⁸ И рече ей дщерь фараонова: иди. Шедши же отроковица, призва матерь отрочате. ⁹ Рече же к ней дщерь фараонова: соблюди ми отроча сие и воздой ми е: аз же дам ти мзду. Взя же отроча жена и дояше е. ¹⁰ Возмужавшу же отрочати, введе е ко дщери фараонове, и бысть ей в сына, и нарече имя ему моисей, глаголющи: от воды взях его. ¹¹ Бысть же во дни многия оны, велик быв моисей, изыде к братиям своим, сыном израилевым. Разумев же болезнь их, виде человека египтянина биюща некоего евреанина от братии его сынов израилевых. ¹² Обозревся же семо и овамо, ни когоже виде: и поразив египтянина, скры его в песце. ¹³ Изшед же во вторый день, виде два мужа евреанина биющася и глагола обидящему: чесо ради ты биеши искренняго? ¹⁴ Он же рече: кто тя постави князя и судию над нами? еда убити мя ты хощеши, имже образом убил еси вчера египтянина? Убояся же моисей и рече: аще сице явлен бысть глагол сей? ¹⁵ Услыша же фараон глагол сей и искаше убити моисеа. Отиде же моисей от лица фараонова и вселися в земли мадиамстей: пришед же в землю мадиамскую седе при кладязе. ¹⁶ Священнику же мадиамскому беша седмь дщерей, пасущих овцы отца своего иофора: пришедшя же черпаху, дондеже наполниша корыта, напоити овцы отца своего иофора. ¹⁷ Пришедше же пастырие изгнаша я. Востав же моисей избави их, и налия им и напои овцы их. ¹⁸ Приидоша же к рагуилу отцу своему. Он же рече им: что яко ускористе приити днесь? ¹⁹ Оныя же рекоша: человек египтянин избави нас от пастырей, и начерпа нам и напои овцы нашя. ²⁰ Он же рече дщерем своим: и где есть? и вскую сице остависте человека? призовите убо его, да яст хлеб. ²¹ Вселися же моисей у человека: и даде сепфору дщерь свою моисею в жену. ²² Во чреве же заченши жена роди сына, и нарече моисей имя ему гирсам, глаголя: яко пришлец есмь в земли чуждей. Еще же заченши роди сына втораго, и нарече имя ему елиезер, глаголя: Бог бо отца моего помощник мой и избави мя из руки фараоновы. ²³ По днех же многих тех, умре царь египетский, и возстенаша сынове израилевы от дел и возопиша, и взыде вопль их к Богу от дел. ²⁴ И услыша Бог стенание их: и помяну Бог завет свой иже ко аврааму и исааку и иакову, ²⁵ и призре Бог на сыны израилевы, и познан бысть ими.