¹ Сия имена сынов израилевых, входящих во египет вкупе со иаковом отцем их, кийждо со всем домом своим внидоша: ² рувим, симеон, левий, иуда, ³ иссахар, завулон и вениамин, ⁴ дан и неффалим, гад и асир: иосиф же бяше во египте. ⁵ Бяше же всех душ изшедших из иакова седмьдесят пять. ⁶ Умре же иосиф, и вся братия его, и весь род оный: ⁷ сынове же израилевы возрастоша и умножишася, и мнози быша и укрепишася зело зело: умножи же их земля. ⁸ Воста же царь ин во египте, иже не знаше иосифа, ⁹ рече же языку своему: се, род сынов израилевых великое множество и укрепляется паче нас: ¹⁰ приидите убо, прехитрим их, да не когда умножатся: и егда аще приключится нам брань, приложатся и сии к супостатом, и одолевше нам изыдут из земли (нашея). ¹¹ И пристави над ними приставники дел, да озлобят их в делех. И создаша грады тверды фараону: пифо, и рамесси, и он, иже есть илиополь. ¹² По елику же их смиряху, толико множайшии бываху и укрепляхуся зело зело. И гнушахуся египтяне сынми израилевыми, ¹³ и насилие творяху египтяне сыном израилевым нуждею, ¹⁴ и болезненну тем жизнь творяху в делех жестоких брением и плинфоделанием, и всеми делы, яже в полях, во всех делех, имиже порабощаху их с нуждею. ¹⁵ И рече царь египетский бабам еврейским: единей их имя сепфора и имя вторей фуа, ¹⁶ и рече (им): егда бабите евреаныням, и суть к рождению, аще убо мужеский пол будет, убивайте его: аще же женский, снабдевайте его. ¹⁷ Убояшася же бабы Бога, и не сотвориша, якоже повеле им царь египетский, и живляху мужеский пол. ¹⁸ Призва же царь египетский бабы и рече им: что яко сотвористе вещь сию, и оживляете мужеский пол? ¹⁹ Рекоша же бабы фараону: не яко жены ег¦птяныни, тако и жены евреаныни: раждают бо прежде неже внити к ним бабам, и раждаху. ²⁰ Благо же творяше Бог бабам, и множахуся людие и укрепляхуся зело. ²¹ И понеже бояхуся бабы Бога, сотвориша себе жилища. ²² Заповеда же фараон всем людем своим, глаголя: всяк мужеский пол, иже родится евреом, в реку ввергайте, и всяк женский пол снабдевайте и жив.