¹ Посем явися паки Иисус учеником (своим, востав от мертвых,) на мори тивериадстем. Явися же сице: ² бяху вкупе симон петр, и фома нарицаемыи близнец, и нафанаил, иже (бе) от каны галилейския, и сына зеведеова, и ина от ученик его два. ³ Глагола им симон петр: иду рыбы ловити. Глаголаша ему: идем и мы с тобою. Изыдоша (же) и вседоша абие в корабль, и в ту нощь не яша ничесоже. ⁴ Утру же бывшу, ста Иисус при брезе: не познаша же ученицы, яко Иисус есть. ⁵ глагола же им Иисус: дети, еда что снедно имате? Отвещаша ему: ни. ⁶ Он же рече им: вверзите мрежу о десную страну корабля и обрящете. Ввергоша же и ктому не можаху привлещи ея от множества рыб. ⁷ Глагола же ученик той, егоже любляше Иисус, петрови: Господь есть. Симон же петр слышав, яко Господь есть, епендитом препоясася, бе бо наг, и ввержеся в море: ⁸ а друзии ученицы кораблецем приидоша, не беша бо далече от земли, но яко две сте лактей, влекуще мрежу рыб. ⁹ Егда убо излезоша на землю, видеша огнь лежащь и рыбу на нем лежащу и хлеб. ¹⁰ (И) глагола им Иисус: принесите от рыб, яже ясте ныне. ¹¹ Влез (же) симон петр, извлече мрежу на землю, полну великих рыб сто (и) пятьдесят (и) три: и толико сущым, не проторжеся мрежа. ¹² глагола им Иисус: приидите, обедуйте. Ни един же смеяше от ученик истязати его: ты кто еси? ведяще, яко Господь есть. ¹³ Прииде же Иисус, и прият хлеб и даде им, и рыбу такожде. ¹⁴ Се уже третие явися Иисус учеником своим, востав от мертвых. ¹⁵ Егда же обедоваше, глагола симону петру Иисус: симоне ионин, любиши ли мя паче сих? Глагола ему: ей, Господи, ты веси, яко люблю тя. глагола ему: паси агнцы моя. ¹⁶ глагола ему паки второе: симоне ионин, любиши ли мя? Глагола ему: ей, Господи, ты веси, яко люблю тя. глагола ему: паси овцы моя. ¹⁷ глагола ему третие: симоне ионин, любиши ли мя? Оскорбе (же) петр, яко рече ему третие: любиши ли мя? и глагола ему: Господи, ты вся веси: ты веси, яко люблю тя. глагола ему Иисус: паси овцы моя: ¹⁸ аминь, аминь глаголю тебе: егда был еси юн, поясался еси сам и ходил еси, аможе хотел еси: егда же состареешися, воздежеши руце твои, и ин тя пояшет и ведет, аможе не хощеши. ¹⁹ Сие же рече, назнаменуя, коею смертию прославит Бога. И сия рек, глагола ему: иди по мне. ²⁰ Обращься же петр виде ученика, егоже любляше Иисус, вслед идуща, иже и возлеже на вечери на перси его и рече: Господи, кто есть предаяй тя? ²¹ Сего видев петр, глагола Иисусови: Господи, сей же что? ²² глагола ему Иисус: аще хощу, да той пребывает, дондеже прииду, что к тебе? ты по мне гряди. ²³ Изыде же слово се в братию, яко ученик той не умрет. И не рече ему Иисус, яко не умрет, но: аще хощу тому пребывати, дондеже прииду, что к тебе? ²⁴ Сей есть ученик свидетелствуяй о сих, иже и написа сия: и вем, яко истинно есть свидетелство его. ²⁵ Суть же и ина многа, яже сотвори Иисус, яже аще бы по единому писана быша, ни самому мню (всему) миру вместити пишемых книг. Аминь.