¹ Да не смущается сердце ваше: веруйте в Бога, и в мя веруйте: ² в дому Отца моего обители многи суть: аще ли же ни, рекл бых вам: иду уготовати место вам: ³ и аще уготовлю место вам, паки прииду и поиму вы к себе, да идеже есмь аз, и вы будете: ⁴ и аможе аз иду, весте, и путь весте. ⁵ Глагола ему фома: Господи, не вемы, камо идеши: и како можем путь ведети? ⁶ глагола ему Иисус: аз есмь путь и истина и живот: никтоже приидет ко Отцу, токмо мною: ⁷ аще мя бысте знали, и Отца моего знали бысте (убо): и отселе познасте его, и видесте его. ⁸ Глагола ему филипп: Господи, покажи нам Отца, и довлеет нам. ⁹ глагола ему Иисус: толико время с вами есмь, и не познал еси мене, филиппе? видевый мене виде Отца: и како ты глаголеши: покажи нам Отца? ¹⁰ не веруеши ли, яко аз во Отце, и Отец во мне есть? глаголголы, яже аз глаголю вам, о себе не глаголю: Отец же во мне пребываяй, той творит дела: ¹¹ веруйте мне, яко аз во Отце, и Отец во мне: аще ли же ни, за та дела веру имите ми. ¹² Аминь, аминь глаголю вам: веруяй в мя, дела, яже аз творю, и той сотворит, и болша сих сотворит: яко аз ко Отцу моему гряду: ¹³ и еже аще что просите (от Отца) во имя мое, то сотворю, да прославится Отец в Сыне: ¹⁴ (и) аще чесо просите во имя мое, аз сотворю. ¹⁵ Аще любите мя, заповеди моя соблюдите, ¹⁶ и аз умолю Отца, и иного утешителя даст вам, да будет с вами в век, ¹⁷ Дух истины, егоже мир не может прияти, яко не видит его, ниже знает его: вы же знаете его, яко в вас пребывает и в вас будет. ¹⁸ Не оставлю вас сиры: прииду к вам: ¹⁹ еще мало, и мир ктому не увидит мене: вы же увидите мя, яко аз живу, и вы живи будете: ²⁰ в той день уразумеете вы, яко аз во Отце моем, и вы во мне, и аз в вас. ²¹ Имеяй заповеди моя и соблюдаяй их, той есть любяй мя: а любяй мя возлюблен будет Отцем моим, и аз возлюблю его и явлюся ему сам. ²² Глагола ему иуда не искариотский: Господи, и что бысть, яко нам хощеши явитися, а не мирови? ²³ Отвеща Иисус и рече ему: аще кто любит мя, слово мое соблюдет: и Отец мой возлюбит его, и к нему приидема и обитель у него сотворима: ²⁴ не любяй мя словес моих не соблюдает: и слово, еже слышасте, несть мое, но пославшаго мя Отца. ²⁵ Сия глаголах вам в вас сый: ²⁶ утешитель же, Дух святый, егоже послет Отец во имя мое, той вы научит всему и воспомянет вам вся, яже рех вам. ²⁷ Мир оставляю вам, мир мой даю вам: не якоже мир дает, аз даю вам. Да не смущается сердце ваше, ни устрашает. ²⁸ Слышасте, яко аз рех вам: иду и прииду к вам. Аще бысте любили мя, возрадовалися бысте (убо), яко рех: иду ко Отцу: яко Отец мой болий мене есть. ²⁹ И ныне рех вам, прежде даже не будет, да, егда будет, веру имете. ³⁰ Ктому не много глаголю с вами: грядет бо сего мира князь и во мне не имать ничесоже. ³¹ Но да разумеет мир, яко люблю Отца, и якоже заповеда мне Отец, тако творю: востаните, идем отсюду.