¹ И вшед прохождаше иерихон. ² И се, муж нарицаемый закхей, и сей бе старей мытарем, и той бе богат: ³ и искаше видети Иисуса, кто есть, и не можаше от народа, яко возрастом мал бе: ⁴ и предитек, возлезе на ягодичину, да видит, яко хотяше мимо ея проити. ⁵ И яко прииде на место, воззрев Иисус виде его и рече к нему: закхее, потщався слези: днесь бо в дому твоем подобает ми быти. ⁶ И потщався слезе и прият его радуяся. ⁷ И видевше вси роптаху, глаголюще, яко ко грешну мужу вниде витати. ⁸ Став же закхей рече ко Господу: се, пол имения моего, Господи, дам нищым: и аще кого чим обидех, возвращу четверицею. ⁹ Рече же к нему Иисус, яко днесь спасение дому сему бысть, зане и сей сын авраамль есть: ¹⁰ прииде бо Сын Человечь взыскати и спасти погибшаго. ¹¹ Слышащым же им сия, приложь рече притчу, зане близ ему быти Иерусалима, и мняху, яко абие Царство Божие хощет явитися. ¹² Рече убо: человек некий добра рода иде на страну далече прияти себе царство и возвратитися: ¹³ призвав же десять раб своих, даде им десять мнас и рече к ним: куплю дейте, дондеже прииду. ¹⁴ И граждане его ненавидяху его и послаша послы вслед его, глаголюще: не хощем сему, да царствует над нами. ¹⁵ И бысть егда возвратися приим царство, рече пригласити рабы тыя, имже даде сребро, да увесть, какову куплю суть сотворили. ¹⁶ Прииде же первый, глаголя: господи, мнас твоя придела десять мнас. ¹⁷ И рече ему: благо, рабе добрый: яко о мале верен был еси, буди область имея над десятию градов. ¹⁸ И прииде вторый, глаголя: господи, мнас твоя сотвори пять мнас. ¹⁹ Рече же и тому: и ты буди над пятию градов. ²⁰ И другий прииде, глаголя: господи, се, мнас твоя, юже имех положену во убрусе: ²¹ бояхся бо тебе, яко человек яр еси, вземлеши, егоже не положил еси, и жнеши, егоже не сеял еси. ²² Глагола же ему: от уст твоих сужду ти, лукавый рабе: ведел еси, яко аз человек яр есмь, вземлю, егоже не положих, и жну, егоже не сеях: ²³ и почто не вдал еси моего сребра купцем, и аз пришед с лихвою истязал бых е? ²⁴ И предстоящым рече: возмите от него мнас и дадите имущему десять мнас. ²⁵ И реша ему: господи, имать десять мнас. ²⁶ Глаголю бо вам, яко всякому имущему дастся: а от неимущаго, и еже имать, отимется от него: ²⁷ обаче враги моя оны, иже не восхотеша мене, да царь бых был над ними, приведите семо и изсецыте предо мною. ²⁸ И сия рек, идяше преди, восходя во Иерусалим. ²⁹ И бысть яко приближися в вифсфагию и вифанию, к горе нарицаемей елеон, посла два ученик своих, ³⁰ глаголя: идита в прямную весь: (и) в нюже входяща обрящета жребя привязано, на неже никтоже николиже от человек вседе: отрешша е приведита: ³¹ и аще кто вы вопрошает: почто отрешаета? сице рцыта ему, яко Господь его требует. ³² Шедша же посланная обретоста, якоже рече има. ³³ Отрешающема же има жребя, рекоша господие его к нима: что отрешаета жребя? ³⁴ Она же рекоста, яко Господь его требует. ³⁵ И приведоста е ко Иисусови: и возвергше ризы своя на жребя, всадиша Иисуса. ³⁶ Идущу же ему, постилаху ризы своя по пути. ³⁷ Приближающужеся ему уже (абие) к низхождению горе елеонстей, начаша все множество ученик радующеся хвалити Бога гласом велиим о всех силах, яже видеша, ³⁸ глаголюще: благословен грядый Царь во имя Господне: мир на небеси и слава в вышних. ³⁹ И нецыи фарисее от народа реша к нему: Учителю, запрети учеником твоим. ⁴⁰ И отвещав рече им: глаголю вам, яко, аще сии умолчат, камение возопиет. ⁴¹ И яко приближися, видев град, плакася о нем, ⁴² глаголя: яко аще бы разумел и ты, в день сей твой, еже к смирению твоему: ныне же скрыся от очию твоею: ⁴³ яко приидут дние на тя, и обложат врази твои острог о тебе, и обыдут тя, и оымут тя отвсюду, ⁴⁴ и разбиют тя и чада твоя в тебе, и не оставят камень на камени в тебе: понеже не разумел еси времене посещения твоего. ⁴⁵ И вшед в церковь, начат изгонити продающыя в ней и купующыя, ⁴⁶ глаголя им: писано есть: дом мой дом молитвы есть: вы же сотвористе его пещеру разбойником. ⁴⁷ И бе учя по вся дни в церкви. Архиерее же и книжницы искаху его погубити, и старейшины людем: ⁴⁸ и не обретаху, что бы сотворили ему: людие бо вси держахуся его, послушающе его.