¹ И минувшей субботе, мариа магдалина и мариа иаковля и саломиа купиша ароматы, да пришедшя помажут Иисуса. ² И зело заутра во едину от суббот приидоша на гроб, возсиявшу солнцу, ³ и глаголаху к себе: кто отвалит нам камень от дверий гроба? ⁴ И воззревшя видеша, яко отвален бе камень: бе бо велий зело. ⁵ И вшедшя во гроб, видеша юношу седяща в десных, одеяна во одежду белу: и ужасошася. ⁶ Он же глагола им: не ужасайтеся: Иисуса ищете назарянина распятаго: воста, несть зде: се, место, идеже положиша его: ⁷ но идите, рцыте учеником его и петрови, яко варяет вы в галилеи: тамо его видите, якоже рече вам. ⁸ И изшедшя бежаша от гроба: имяше же их трепет и ужас: и ни комуже ничтоже реша: бояхубося. ⁹ воскрес же (Иисус) заутра в первую субботу, явися прежде марии магдалини, из неяже изгна седмь бесов. ¹⁰ Она (же) шедши возвести с ним бывшым, плачущымся и рыдающым: ¹¹ и они слышавше, яко жив есть и виден бысть от нея, не яша веры. ¹² По сих же двема от них грядущема явися инем образом, идущема на село. ¹³ И та шедша возвестиста прочым: и ни тема веры яша. ¹⁴ Последи (же) возлежащым им единомунадесяте явися, и поноси неверствию их и жестосердию, яко видевшым его воставша не яша веры. ¹⁵ И рече им: шедше в мир весь, проповедите Евангелие всей твари. ¹⁶ Иже веру имет и крестится, спасен будет: а иже не имет веры, осужден будет. ¹⁷ Знамения же веровавшым сия последуют: именем моим бесы ижденут: языки возглаголют новы: ¹⁸ змия возмут: аще и что смертно испиют, не вредит их: на недужныя руки возложат, и здрави будут. ¹⁹ Господь же убо, по глаголголании (его) к ним, вознесеся на небо и седе о десную Бога. ²⁰ Они же изшедше проповедаша всюду, Господу поспешствующу и слово утверждающу последствующими знаменьми. Аминь.