¹ И начат им в притчах глаголати: виноград насади человек, и огради оплотом, и ископа точило, и созда столп, и предаде его тяжателем, и отиде. ² И посла к тяжателем во время раба, да от тяжатель приимет от плода винограда: ³ они же емше его биша и отослаша тща. ⁴ И паки посла к ним другаго раба: и того камением бивше, пробиша главу ему и послаша безчестна. ⁵ И паки иного посла: и того убиша: и многи ины, овы убо биюще, овы же убивающе. ⁶ Еще убо единаго сына име возлюбленнаго своего, посла и того к ним последи, глаголя, яко усрамятся сына моего. ⁷ Они же тяжателе реша к себе, яко сей есть наследник: приидите, убием его, и наше будет наследствие. ⁸ И емше его убиша и извергоша его вон из винограда. ⁹ Что убо сотворит господь винограда? Приидет и погубит тяжатели и даст виноград инем. ¹⁰ Ни писания ли сего чли есте: камень, егоже не в ряду сотвориша зиждущии, сей бысть во главу угла: ¹¹ от Господа бысть сие, и есть дивно во очию нашею? ¹² И искаху его яти, и убояшася народа: разумеша бо, яко к ним притчу рече: и оставльше его отидоша. ¹³ И послаша к нему некия от фарисей и иродиан, да его обольстят словом. ¹⁴ Они же пришедше глаголаша ему: учителю, вемы, яко истинен еси и не радиши ни о комже: не зриши бо на лице человеков, но воистинну пути Божию учиши: достоит ли кинсон кесареви дати, или ни? дамы ли, или не дамы? ¹⁵ Он же ведый их лицемерие, рече им: что мя искушаете? принесите ми пенязь, да вижу. ¹⁶ Они же принесоша. И глагола им: чий образ сий и написание? Они же реша ему: кесарев. ¹⁷ И отвещав Иисус рече им: воздадите кесарева кесареви и Божия Богови. И чудишася о нем. ¹⁸ И приидоша саддукее к нему, иже глаголют воскресению не быти: и вопросиша его, глаголюще: ¹⁹ учителю, моисей написа нам, яко аще кому брат умрет и оставит жену, а чад не оставит: да поймет брат его жену его и воскресит семя брату своему. ²⁰ Седмь братий бе: и первый поят жену и умирая не остави семене: ²¹ и вторый поят ю и умре, и ни той остави семене: и третий такожде: ²² и пояша ю седмь и не оставиша семене: последи же всех умре и жена. ²³ В воскресение убо, егда воскреснут, которому их будет жена: седмь бо имеша ю жену. ²⁴ И отвещав Иисус рече им: не сего ли ради прельщаетеся, не ведуще писания, ни силы Божия? ²⁵ егда бо из мертвых воскреснут, ни женятся, ни посягают, но суть яко ангели на небесех: ²⁶ о мертвых же, яко востают, несте ли чли в книгах моисеовых, при купине яко рече ему Бог, глаголя: аз Бог авраамов и Бог исааков и Бог иаковль? ²⁷ несть Бог мертвых, но Бог живых: вы убо много прельщаетеся. ²⁸ И приступль един от книжник, слышав их стязающихся и видев, яко добре отвеща им, вопроси его: кая есть первая всех заповедий? ²⁹ Иисус же отвеща ему: яко первейши всех заповедий: слыши, израилю, Господь Бог ваш Господь един есть: ³⁰ и возлюбиши Господа Бога твоего всем сердцем твоим, и всею душею твоею, и всем умом твоим, и всею крепостию твоею: сия есть первая заповедь. ³¹ И вторая подобна ей: возлюбиши ближняго своего яко сам себе. Болшая сею ина заповедь несть. ³² И рече ему книжник: добре, учителю, воистинну рекл еси, яко един есть Бог, и несть ин разве его: ³³ и еже любити его всем сердцем, и всем разумом, и всею душею, и всею крепостию: и еже любити ближняго яко себе, боле есть всех всесожжений и жертв. ³⁴ Иисус же видев, яко смысленно отвеща, рече ему: не далече еси от Царствия Божия. И никтоже смеяше ктому его вопросити. ³⁵ И отвещав Иисус глаголаше, учя в церкви: како глаголют книжницы, яко Христос Сын есть давидов? ³⁶ Той бо давид рече Духом святым: глагола Господь Господеви моему: седи о десную мене, дондеже положу враги твоя подножие ногама твоима. ³⁷ Сам убо давид глаголет его Господа: и откуду Сын ему есть? И мног народ послушаше его в сладость. ³⁸ И глаголаше им во учении своем: блюдитеся от книжник, хотящих во одеяниих ходити, и целования на торжищих, ³⁹ и преждеседания на сонмищих, и первовозлежания на вечерях: ⁴⁰ поядающе домы вдовиц и непщеванием надолзе молящеся, сии приимут лишшее осуждение. ⁴¹ И сед Иисус прямо сокровищному хранилищу, зряше, како народ мещет медь в сокровищное хранилище. И мнози богатии вметаху многа. ⁴² И пришедши едина вдовица убога, вверже лепте две, еже есть кодрант. ⁴³ И призвав ученики своя, рече им: аминь глаголю вам, яко вдовица сия убогая множае всех вверже вметающих в сокровищное хранилище: ⁴⁴ вси бо от избытка своего ввергоша: сия же от лишения своего вся, елика имеяше, вверже, все житие свое.