¹ И изыде оттуду и прииде во отечествие свое: и по нем идоша ученицы его. ² И бывшей субботе, начат на сонмищи учити. И мнози слышащии дивляхуся, глаголюще: откуду сему сия? и что премудрость данная ему, и силы таковы рукама его бывают? ³ не сей ли есть тектон, Сын Мариин, брат же иакову и иосии и иуде и симону? и не сестры ли его зде (суть) в нас? И блажняхуся о нем. ⁴ глаголаше же им Иисус, яко несть пророк без чести, токмо во отечествии своем, и в сродстве и в дому своем. ⁵ И не можаше ту ни единыя силы сотворити, токмо мало недужных, возложь руце, изцели. ⁶ И дивляшеся за неверствие их: и обхождаше веси окрест учя. ⁷ И призва обанадесяте, и начат их посылати два два, и даяше им власть над духи нечистыми. ⁸ И заповеда им, да ничесоже возмут на путь, токмо жезл един: ни пиры, ни хлеба, ни при поясе меди: ⁹ но обувени в сандалия: и не облачитися в две ризе. ¹⁰ И глаголаше им: идеже аще внидете в дом, ту пребывайте, дондеже изыдете оттуду: ¹¹ и елицы аще не приимут вы, ниже послушают вас, исходяще оттуду, оттрясите прах, иже под ногами вашими, во свидетелство им: аминь глаголю вам, отраднее будет содомом и гоморром в день судный, неже граду тому. ¹² И изшедше проповедаху, да покаются: ¹³ и бесы многи изгоняху: и мазаху маслом многи недужныя, и изцелеваху. ¹⁴ И услыша царь ирод: яве бо бысть имя его: и глаголаше, яко иоанн креститель от мертвых воста, и сего ради силы деются о нем. ¹⁵ Инии глаголаху, яко илиа есть: инии же глаголаху, яко пророк есть, или яко един от пророк. ¹⁶ Слышав же ирод рече, яко, егоже аз усекнух иоанна, той есть: той воста от мертвых. ¹⁷ Той бо ирод послав, ят иоанна и связа его в темнице, иродиады ради жены филиппа брата своего, яко оженися ею. ¹⁸ Глаголаше бо иоанн иродови: не достоит тебе имети жену (филиппа) брата твоего. ¹⁹ Иродиа же гневашеся на него и хотяше его убити: и не можаше. ²⁰ Ирод бо бояшеся иоанна, ведый его мужа праведна и свята, и соблюдаше его: и послушав его, многа творяше, и в сладость его послушаше. ²¹ И приключшуся дню потребну, егда ирод рождеству своему вечерю творяше князем своим и тысящником и старейшинам галилейским: ²² и вшедши дщерь тоя иродиады, и плясавши, и угождши иродови и возлежащым с ним, рече царь девице: проси у мене егоже аще хощеши, и дам ти. ²³ И клятся ей: яко егоже аще попросиши у мене, дам ти, и до пол царствия моего. ²⁴ Она же изшедши рече матери своей: чесо прошу? Она же рече: главы иоанна крестителя. ²⁵ И вшедши абие со тщанием к царю, просяше, глаголющи: хощу, да ми даси от него на блюде главу иоанна крестителя. ²⁶ И прискорбен быв царь, клятвы (же) ради и за возлежащих с ним не восхоте отрещи ей. ²⁷ И абие послав царь спекулатора, повеле принести главу его. ²⁸ Он же шед усекну его в темнице, и принесе главу его на блюде, и даде ю девице: и девица даде ю матери своей. ²⁹ И слышавше ученицы его, приидоша и взяша труп его, и положиша его во гробе. ³⁰ И собрашася апостоли ко Иисусу и возвестиша ему вся, и елика сотвориша, и елика научиша. ³¹ И рече им: приидите вы сами в пусто место едини и почийте мало. Бяху бо приходящии и отходящии мнози, и ни ясти им бе когда. ³² И идоша в пусто место кораблем едини. ³³ И видеша их идущих народи, и познаша их мнози: и пеши от всех градов стицахуся тамо, и предвариша их, и снидошася к нему. ³⁴ И изшед виде Иисус народ мног и милосердова о них, зане бяху яко овцы не имущыя пастыря: и начат их учити много. ³⁵ И уже часу многу бывшу, приступльше к нему ученицы его, глаголаша, яко пусто есть место, и уже час мног: ³⁶ отпусти их, да шедше во окрестных селех и весех купят себе хлебы: не имут бо чесо ясти. ³⁷ Он же отвещав рече им: дадите им вы ясти. И глаголаша ему: да шедше купим двема стома пенязь хлебы и дамы им ясти? ³⁸ Он же рече им: колико хлебы имате? идите и видите. И уведевше глаголаша: пять (хлеб), и две рыбе. ³⁹ И повеле им посадити вся на споды на споды на траве зелене. ⁴⁰ И возлегоша на лехи на лехи по сту и по пятидесят. ⁴¹ И приемь пять хлеб и две рыбе, воззрев на небо, благослови и преломи хлебы, и даяше учеником своим, да предлагают пред ними: и обе рыбе раздели всем. ⁴² И ядоша вси и насытишася: ⁴³ и взяша укрухи, дванадесяте кошя исполнь, и от рыбу. ⁴⁴ Бяше же ядших хлебы яко пять тысящ мужей. ⁴⁵ И абие понуди ученики своя внити в корабль и варити его на он пол к вифсаиде, дондеже сам отпустит народы. ⁴⁶ И отрекся им, иде в гору помолитися. ⁴⁷ И вечеру бывшу, бе корабль посреде моря, и сам един на земли. ⁴⁸ И виде их страждущих в плавании: бе бо ветр противен им: и о четвертей стражи нощней прииде к ним, по морю ходяй, и хотяше минути их. ⁴⁹ Они же видевше его ходяща по морю, мняху призрак быти и возопиша. ⁵⁰ Вси бо его видеша и смутишася. И абие глагола с ними и рече им: дерзайте: аз есмь, не бойтеся. ⁵¹ И вниде к ним в корабль: и улеже ветр. И зело излиха в себе ужасахуся и дивляхуся. ⁵² Не разумеша бо о хлебех: бе бо сердце их окаменено. ⁵³ И прешедше приидоша в землю геннисаретску и присташа. ⁵⁴ И изшедшым им из корабля, абие познаша его, ⁵⁵ обтекше всю страну ту, начаша на одрех приносити болящыя, идеже слышаху, яко ту есть. ⁵⁶ И аможе аще вхождаше в веси, или во грады, или села, на распутиих полагаху недужныя и моляху его, да поне воскрилию ризы его прикоснутся: и елицы аще прикасахуся ему, спасахуся.