¹ И вниде паки в сонмище: и бе тамо человек, суху имый руку. ² И назираху его, аще в субботы изцелит его, да нань возглаголют. ³ И глагола человеку суху имущему руку: стани посреде. ⁴ И глагола им: достоит ли в субботы добро творити, или зло творити? душу спасти, или погубити? Они же молчаху. ⁵ И воззрев на них со гневом, скорбя о окаменении сердец их, глагола человеку: простри руку твою. И простре: и утвердися рука его цела яко другая. ⁶ И изшедше фарисее, абие со иродианы совет творяху нань, како его погубят. ⁷ Иисус же отиде со ученики своими к морю: и мног народ от галилеи по нем иде, и от иудеи, ⁸ и от Иерусалима, и от идумеи, и со онаго полу иордана. И от тира и сидона множество многое, слышавше, елика творяше, (и) приидоша к нему. ⁹ И рече учеником своим, да корабль будет у него народа ради, да не стужают ему. ¹⁰ Многи бо изцели, якоже нападати на него, да ему прикоснутся, елицы имеяху раны. ¹¹ И дуси нечистии, егда видяху его, припадаху к нему и зваху, глаголюще, яко ты еси Сын Божий. ¹² И много прещаше им, да не явлена его сотворят. ¹³ И взыде на гору и призва, ихже хотяше сам: и приидоша к нему. ¹⁴ И сотвори дванадесяте, да будут с ним, и да посылает их проповедати, ¹⁵ и имети власть целити недуги и изгонити бесы: ¹⁶ и нарече симону имя петр: ¹⁷ и иакова зеведеова и иоанна брата иаковля: и нарече има имена воанергес, еже есть сына громова: ¹⁸ и андреа, и филиппа, и варфоломеа, и матфеа, и фому, и иакова алфеова, и фаддеа, и симона кананита, ¹⁹ и иуду искариотскаго, иже и предаде его. ²⁰ И приидоша в дом: и собрася паки народ, яко не мощи им ни хлеба ясти. ²¹ И слышавше иже бяху у него, изыдоша, да имут его: глаголаху бо, яко неистов есть. ²² И книжницы, иже от Иерусалима низшедшии, глаголаху, яко веельзевула имать и яко о князи бесовстем изгонит бесы. ²³ И призвав их, в притчах глаголаше им: како может сатана сатану изгонити? ²⁴ И аще царство на ся разделится, не может стати царство то: ²⁵ и аще дом на ся разделится, не может стати дом той: ²⁶ и аще сатана воста на ся сам и разделися, не может стати, но конец имать. ²⁷ Никтоже может сосуды крепкаго, вшед в дом его, расхитити, аще не первее крепкаго свяжет: и тогда дом его расхитит. ²⁸ Аминь глаголю вам, яко вся отпустятся согрешения сыном человеческим, и хуления, елика аще восхулят: ²⁹ а иже восхулит на Духа святаго, не имать отпущения во веки, но повинен есть вечному суду. ³⁰ Зане глаголаху: духа нечистаго имать. ³¹ Приидоша убо Мати и братия его, и вне стояще послаша к нему, зовуще его. ³² И седяше народ окрест его. Реша же ему: се, Мати твоя и братия твоя (и сестры твоя) вне ищут тебе. ³³ И отвеща им, глаголя: кто есть Мати моя, или братия моя? ³⁴ И соглядав окрест себе седящыя, глагола: се, Мати моя и братия моя: ³⁵ иже бо аще сотворит волю Божию, сей брат мой и сестра моя и Мати (ми) есть.