¹ Зачало Евангелиа Иисуса Христа, Сына Божия, ² якоже есть писано во пророцех: се, аз посылаю ангела моего пред лицем твоим, иже уготовит путь твой пред тобою. ³ Глас вопиющаго в пустыни: уготовайте путь Господень, правы творите стези его. ⁴ Бысть иоанн крестяй в пустыни и проповедая крещение покаяния во отпущение грехов. ⁵ И исхождаше к нему вся иудейская страна и Иерусалимляне: и крещахуся вси во иордане реце от него, исповедающе грехи своя. ⁶ Бе же иоанн оболчен власы велблужди, и пояс усмен о чреслех его, и ядый акриды и мед дивий. ⁷ И проповедаше, глаголя: грядет креплий мене вслед мене, емуже несмь достоин преклонься разрешити ремень сапог его: ⁸ аз убо крестих вы водою: той же крестит вы Духом святым. ⁹ И бысть во онех днех, прииде Иисус от назарета галилейскаго и крестися от иоанна во иордане. ¹⁰ И абие восходя от воды, виде разводящася небеса и Духа яко голубя, сходяща нань. ¹¹ И глас бысть с небесе: ты еси Сын мой возлюбленный, о немже благоволих. ¹² И абие Дух изведе его в пустыню. ¹³ И бе ту в пустыни дний четыредесять, искушаемь сатаною, и бе со зверьми: и ангели служаху ему. ¹⁴ По предании же иоаннове, прииде Иисус в галилею, проповедая Евангелие Царствия Божия ¹⁵ и глаголя, яко исполнися время и приближися Царствие Божие: покайтеся и веруйте во Евангелие. ¹⁶ Ходя же при мори галилейстем, виде симона и андреа брата (того) симона, вметающа мрежи в море: беста бо рыбаря. ¹⁷ И рече има Иисус: приидита вслед мене, и сотворю вас быти ловца человеком. ¹⁸ И абие оставльша мрежи своя, по нем идоста. ¹⁹ И прешед мало оттуду, узре иакова зеведеова и иоанна брата его, и та в корабли строяща мрежа: ²⁰ и абие воззва я. И оставльша отца своего зеведеа в корабли с наемники, по нем идоста. ²¹ И внидоша в капернаум: и абие в субботы вшед в сонмище, учаше. ²² И дивляхуся о учении его: бе бо учя их яко власть имый, и не яко книжницы. ²³ И бе в сонмищи их человек в дусе нечисте, и воззва, ²⁴ глаголя: остави, что нам и тебе, Иисусе назарянине? пришел еси погубити нас: вем тя, кто еси, святый Божий. ²⁵ И запрети ему Иисус, глаголя: умолчи и изыди из него. ²⁶ И стрясе его дух нечистый, и возопи гласом великим, и изыде из него. ²⁷ И ужасошася вси, якоже стязатися им к себе, глаголющым: что есть сие? (и) что учение новое сие, яко по области и духовом нечистым велит, и послушают его? ²⁸ Изыде же слух его абие во всю страну галилейску. ²⁹ И абие из сонмища изшедше, приидоша в дом симонов и андреов со иаковом и иоанном. ³⁰ Теща же симонова лежаше огнем жегома: и абие глаголаша ему о ней. ³¹ И приступль воздвиже ю, емь за руку ея: и остави ю огнь абие, и служаше им. ³² Позде же бывшу, егда захождаше солнце, приношаху к нему вся недужныя и бесныя. ³³ И бе весь град собрался к дверем. ³⁴ И изцели многи зле страждущыя различными недуги: и бесы многи изгна, и не оставляше глаголати бесы, яко ведяху его Христа суща. ³⁵ И утро, нощи сущей зело, востав изыде, и иде в пусто место, и ту молитву деяше. ³⁶ И гнаша его симон и иже с ним: ³⁷ и обретше его, глаголаша ему, яко вси тебе ищут. ³⁸ И глагола им: идем в ближния веси и грады, да и тамо проповем: на сие бо изыдох. ³⁹ И бе проповедая на сонмищих их, во всей галилеи, и бесы изгоня. ⁴⁰ И прииде к нему прокажен, моля его и на колену припадая пред ним, и глаголя ему, яко, аще хощеши, можеши мя очистити. ⁴¹ Иисус же милосердовав, простер руку, коснуся его, и глагола ему: хощу, очистися. ⁴² И рекшу ему, абие отиде от него прокажение, и чист бысть. ⁴³ И запрещь ему, абие изгна его: ⁴⁴ и глагола ему: блюди, ни комуже ничесоже рцы: но шед покажися иерееви и принеси за очищение твое, яже повеле моисей, во свидетелство им. ⁴⁵ Он же изшед начат проповедати много и проносити слово, якоже ктому не мощи ему яве во град внити: но вне в пустых местех бе. И прихождаху к нему отвсюду.