¹ В вечер же субботный, свитающи во едину от суббот, прииде мариа магдалина и другая мариа, видети гроб. ² И се, трус бысть велий: ангел бо Господень сшед с небесе, приступль отвали камень от дверий гроба и седяше на нем: ³ бе же зрак его яко молния, и одеяние его бело яко снег. ⁴ От страха же его сотрясошася стрегущии и быша яко мертви. ⁵ Отвещав же ангел рече женам: не бойтеся вы: вем бо, яко Иисуса распятаго ищете: ⁶ несть зде: воста бо, якоже рече: приидите, видите место, идеже лежа Господь, ⁷ и скоро шедше рцыте учеником его, яко воста от мертвых и се, варяет вы в галилеи: тамо его узрите: се, рех вам. ⁸ И изшедше скоро от гроба со страхом и радостию велиею, текосте возвестити учеником его. ⁹ Егда же идясте возвестити учеником его, и се, Иисус срете я, глаголя: радуйтеся. Оне же приступльше ястеся за нозе его и поклонистеся ему. ¹⁰ Тогда глагола има Иисус: не бойтеся: идите, возвестите братии моей, да идут в галилею, и ту мя видят. ¹¹ Идущема же има, се, нецыи от кустодии пришедше во град, возвестиша архиереом вся бывшая. ¹² И собравшеся со старцы, совет сотвориша, сребреники доволны даша воином, ¹³ глаголюще: рцыте, яко ученицы его нощию пришедше украдоша его, нам спящым: ¹⁴ и аще сие услышано будет у игемона, мы утолим его и вас безпечальны сотворим. ¹⁵ Они же приемше сребреники, сотвориша, якоже научени быша. И промчеся слово сие во иудеех даже до сего дне. ¹⁶ Единии же надесяте ученицы идоша в галилею, в гору, аможе повеле им Иисус: ¹⁷ и видевше его, поклонишася ему: ови же усумнешася. ¹⁸ И приступль Иисус, рече им, глаголя: дадеся ми всяка власть на небеси и на земли: ¹⁹ шедше убо научите вся языки, крестяще их во имя Отца и Сына и святаго Духа, ²⁰ учаще их блюсти вся, елика заповедах вам: и се, аз с вами есмь во вся дни до скончания века. Аминь.