¹ И бысть егда сконча Иисус словеса сия, прейде от галилеи и прииде в пределы иудейския об он пол иордана. ² И по нем идоша народи мнози, и изцели их ту. ³ И приступиша к нему фарисее искушающе его и глаголаша ему: аще достоит человеку пустити жену свою по всяцей вине? ⁴ Он же отвещав рече им: несте ли чли, яко сотворивый искони, мужеский пол и женский сотворил я есть? ⁵ И рече: сего ради оставит человек отца (своего) и матерь и прилепится к жене своей, и будета оба в плоть едину, ⁶ якоже ктому неста два, но плоть едина: еже убо Бог сочета, человек да не разлучает. ⁷ Глаголаша ему: что убо моисей заповеда дати книгу распустную и отпустити ю? ⁸ глагола им: яко моисей по жестосердию вашему повеле вам пустити жены вашя: изначала же не бысть тако: ⁹ глаголю же вам, яко иже аще пустит жену свою, разве словесе прелюбодейна, и оженится иною, прелюбы творит: и женяйся пущеницею прелюбы деет. ¹⁰ Глаголаша ему ученицы его: аще тако есть вина человеку с женою, лучше есть не женитися. ¹¹ Он же рече им: не вси вмещают словесе сего, но имже дано есть: ¹² суть бо скопцы, иже из чрева матерня родишася тако: и суть скопцы, иже скопишася от человек: и суть скопцы, иже исказиша сами себе Царствия ради небеснаго: могий вместити да вместит. ¹³ Тогда приведоша к нему дети, да руце возложит на них и помолится: ученицы же запретиша им. ¹⁴ Иисус же рече (им): оставите детей и не возбраняйте им приити ко мне: таковых бо есть Царство небесное. ¹⁵ И возложь на них руце, отиде оттуду. ¹⁶ И се, един (некий) приступль рече ему: учителю благий, что благо сотворю, да имам живот вечный? ¹⁷ Он же рече ему: что мя глаголеши блага? никтоже благ, токмо един Бог: аще ли хощеши внити в живот, соблюди заповеди. ¹⁸ Глагола ему: кия? Иисус же рече: еже, не убиеши: не прелюбы сотвориши: не украдеши: не лжесвидетелствуеши: ¹⁹ чти отца и матерь: и: возлюбиши искренняго твоего яко сам себе. ²⁰ Глагола ему юноша: вся сия сохраних от юности моея: что есмь еще не докончал? ²¹ Рече ему Иисус: аще хощеши совершен быти, иди, продаждь имение твое и даждь нищым: и имети имаши сокровище на небеси: и гряди вслед мене. ²² Слышав же юноша слово, отиде скорбя: бе бо имея стяжания многа. ²³ Иисус же рече учеником своим: аминь глаголю вам, яко неудобь богатый внидет в Царствие небесное: ²⁴ паки же глаголю вам: удобее есть велбуду сквозе иглине ушы проити, неже богату в Царствие Божие внити. ²⁵ Слышавше же ученицы его, дивляхуся зело, глаголюще: кто убо может спасен быти? ²⁶ Воззрев же Иисус рече им: у человек сие невозможно есть, у Бога же вся возможна. ²⁷ Тогда отвещав петр рече ему: се, мы оставихом вся и вслед тебе идохом: что убо будет нам? ²⁸ Иисус же рече им: аминь глаголю вам, яко вы шедшии по мне, в пакибытие, егда сядет Сын Человеческий на престоле славы своея, сядете и вы на двоюнадесяте престолу, судяще обеманадесяте коленома израилевома: ²⁹ и всяк, иже оставит дом, или братию, или сестры, или отца, или матерь, или жену, или чада, или села, имене моего ради, сторицею приимет и живот вечный наследит: ³⁰ мнози же будут перви последнии, и последни первии.