¹ В то время услыша ирод четвертовластник слух Иисусов ² и рече отроком своим: сей есть иоанн креститель: той воскресе от мертвых, и сего ради силы деются о нем. ³ Ирод бо емь иоанна, связа его и всади в темницу, иродиады ради жены филиппа брата своего: ⁴ глаголаше бо ему иоанн: не достоит ти имети ея. ⁵ И хотящь его убити, убояся народа, зане яко пророка его имеяху. ⁶ Дню же бывшу рождества иродова, пляса дщи иродиадина посреде и угоди иродови: ⁷ темже и с клятвою изрече ей дати, егоже аще воспросит. ⁸ Она же наваждена материю своею, даждь ми, рече, зде на блюде главу иоанна крестителя. ⁹ И печален бысть царь: клятвы же ради и за возлежащих с ним, повеле дати (ей) ¹⁰ и послав усекну иоанна в темнице. ¹¹ И принесоша главу его на блюде и даша девице: и отнесе матери своей. ¹² И приступльше ученицы его взяша тело (его) и погребоша е: и пришедше возвестиша Иисусови. ¹³ И слышав Иисус отиде оттуду в корабли в пусто место един: и слышавше народи по нем идоша пеши от градов. ¹⁴ И изшед Иисус виде мног народ, и милосердова о них, и изцели недужныя их. ¹⁵ Позде же бывшу, приступиша к нему ученицы его, глаголюще: пусто есть место, и час уже мину: отпусти народы, да шедше в веси купят брашна себе. ¹⁶ Иисус же рече им: не требуют отити: дадите им вы ясти. ¹⁷ Они же глаголаша ему: не имамы зде токмо пять хлеб и две рыбе. ¹⁸ Он же рече: принесите ми их семо. ¹⁹ И повелев народом возлещи на траве, и приемь пять хлеб и обе рыбе, воззрев на небо, благослови и преломив даде учеником хлебы, ученицы же народом. ²⁰ И ядоша вси и насытишася: и взяша избытки укрух, дванадесять кошя исполнь: ²¹ ядущих же бе мужей яко пять тысящ, разве жен и детей. ²² И абие понуди Иисус ученики своя влезти в корабль и варити его на оном полу, дондеже отпустит народы. ²³ И отпустив народы, взыде на гору един помолитися: позде же бывшу, един бе ту. ²⁴ Корабль же бе посреде моря влаяся волнами: бе бо противен ветр. ²⁵ В четвертую же стражу нощи иде к ним Иисус, ходя по морю. ²⁶ И видевше его ученицы по морю ходяща, смутишася, глаголюще, яко призрак есть: и от страха возопиша. ²⁷ Абие же рече им Иисус, глаголя: дерзайте: аз есмь, не бойтеся. ²⁸ Отвещав же петр рече: Господи, аще ты еси, повели ми приити к тебе по водам. Он же рече: прииди. ²⁹ И излез из корабля петр, хождаше по водам, приити ко Иисусови: ³⁰ видя же ветр крепок, убояся, и начен утопати, возопи, глаголя: Господи, спаси мя. ³¹ И абие Иисус простер руку, ят его и глагола ему: маловере, почто усумнелся еси? ³² И влезшема има в корабль, преста ветр. ³³ Сущии же в корабли пришедше поклонишася ему, глаголюще: воистинну Божий Сын еси. ³⁴ И прешедше приидоша в землю геннисарефскую. ³⁵ И познавше его мужие места того, послаша во всю страну ту, и принесоша к нему вся болящыя: ³⁶ и моляху его, да токмо прикоснутся вскрилию ризы его: и елицы прикоснушася, спасени быша.