¹ Се, глаголи во уши людем моим словеса пророчества, яже дам во уста твоя, глаголет Господь: ² и сотвори, да на хартии напишутся, яко верна и истинна суть: ³ не бойся от помышлений на тя, ниже да смутятъ тя неверности глаголющих, ⁴ понеже всяк неверный в неверии своем умрет. ⁵ Се, аз наведу (рече Господь) на круг земный злая, мечь и глад, и смерть и погубление, ⁶ понеже оскверни беззаконие всю землю, и наполнена суть дела их вредная. ⁷ Сего ради рече Господь: ⁸ уже не умолчу о нечестиих их, яже беззаконно соделовают, ни потерплю им, яже зле творят: се, кровь неповинная и праведная вопиет ко мне, и души праведных вопиют безпрестанно: ⁹ отмщая отмщу им, рече Господь, и восприиму всяку кровь неповинную от тех ко мне. ¹⁰ Се, людие мои яко стада к заколению ведутся, уже не потерплю того, еже обитати имъ в земли египетстей, ¹¹ но изведу я рукою сильною и мышцею высокою, и поражу (египетъ) казнию якоже прежде, и растлю всю землю его: ¹² восплачется египет, и основания его казнию избиена будут и наказанием, яже наведет ему Бог: ¹³ восплачут делателе делающии землю, яко оскудеют семена их от ржи и града и от звезды страшныя. ¹⁴ Горе веку, и иже обитают в нем: ¹⁵ понеже приближися мечь и сокрушение их, и востанет язык на язык к брани, и мечь в руках их. ¹⁶ Будет бо непостояние человеком, и инии иных одолевающии вознерадят о цари своем, и началницы путий о делех своих в могутстве своем. ¹⁷ Восхощет бо человек во град ити и не возможет: ¹⁸ гордыни бо их ради гради смятутся, домы сокрушатся, человецы убоятся. ¹⁹ Не умилосердится человек ко искреннему своему, на разорение домов их во оружие, на расхищение имений их, глада ради хлебнаго и оскобления многа. ²⁰ Се, аз созываю, рече Господь, вся цари земския, еже мене боятися, иже суть от востока и юга, от севера и ливана, ко обращению къ себе, и воздати, яже воздаша тем: ²¹ якоже творят даже до днесь избраннымъ моим, тако сотворю и воздам в недра их. Сия глаголет Господь Бог: ²² не пощадит десница моя грешников, и не престанет мечь на проливающих кровь неповинную на земли: ²³ изыде огнь от гнева его, и пожре основания земли, и грешники яко хврастие зажжено. ²⁴ Горе сим, иже согрешают и не содержатъ заповедий моих, рече Господь, ²⁵ не прошу им: отидите, сынове, от власти, не оскверняйте святыни моея. ²⁶ Яко весть Господь всех, иже согрешаютъ ему, сего ради предаде их в смерть и въ заколение. ²⁷ Уже бо приидоша на круг земный злая, и пребудете в них, не избавит бо вас Бог, понеже согрешисте пред ним. ²⁸ Се, видение грозное, и лице его от востока: ²⁹ и изыдут рождения змиев аравскихъ на колесницах многих: якоже дыхание (ветровъ) число их понесется по земли, яко уже убоятся и вострепещут вси, иже их услышат: ³⁰ кармоняне неистовствующии во гневе изыдутъ яко вепри от дубравы и приидут в силе велицей, и станут на брань с ними и опустошатъ часть земли ассирийския: ³¹ и по сих превозмогут змиеве помнящии рождение свое и обратятся согласующе в силе велицей на постизание их: ³² сии смутятся, и умолчат в силе их, и обратят нозе свои на бежание: ³³ и от области ассирийския обстоятель обстанетъ их и скончает единаго от них, и будетъ боязнь и страх в полце их, и рвение на цари их. ³⁴ Се, облацы от востока и севера даже до полудне, и лице их грозно зело, исполнено гнева и бури: ³⁵ и сразятся между собою и сразят звезду многу на земли и звезду их: и будет кровь от меча даже до утробы, ³⁶ и гной человеческий даже до седла велблюждя, и будет боязнь и страх мног на земли, ³⁷ и устрашатся, иже узрят гнев сей, и трепет приимет их: ³⁸ и по сем воздвигнутся бури многи от полудне и севера, и часть ина от запада, ³⁹ и премогут ветри от востока, и отворятъ его, и облак, егоже воздвиже во гневе, и звезда на сотворение страха от восточна ветра и западна повредится: ⁴⁰ и воздвигнутся облацы велии и зелнии, полни гнева, и звезда, да устрашат всю землю и обитающих на ней, и возлиют на всяко место высоко и вознесеное звезду страшную, ⁴¹ огнь и град, и мечи летающия и воды многи, яко да наполнятся вся поля и вси источницы исполнением вод многих: ⁴² и сокрушат грады и стены, и горы и холмы, (и удолия) и древа дубравная, и сена лужная и жита их, ⁴³ и пройдут непоколеблеми до вавилона и сокрушатъ его: ⁴⁴ соберутся к нему, и обыдут его, и излиютъ звезду и всю ярость нань: и взыдет прахъ и дым даже до небесе, и вси, иже окрест, возрыдают о нем, ⁴⁵ и иже под ним останут, послужат тем, иже устрашиша их. ⁴⁶ И ты, асие, согласна во упование вавилона, и слава лица его: ⁴⁷ горе тебе бедней! понеже уподобилася еси ему и украсила еси дщери твоя в любодеянии, ко угождению и прославлению в любовных твоих, иже с тобою похотеша всегда блудити: ⁴⁸ ненавиденному подражала еси во всех делехъ его и в начинаниих его. ⁴⁹ Сего ради, рече Господь, послю на тя злая, вдовство, убожество и глад, и мечь и губителство на разорение домов твоих от насилия и смерти, ⁵⁰ и слава силы твоея якоже цвет изсхнет, егда востанет зной, иже послан есть на тя: ⁵¹ изнеможеши якоже убожайшая язвена и наказана от жен, яко не возмогут тебе прияти сильнии и любовницы. ⁵² Еда аз тако возревную тебе, рече Господь, ⁵³ аще бы не заклала еси избранных моихъ во всяко время, возвышающи на поражение руце и глаголющи на смерть их, егда упивалася еси? ⁵⁴ украси лепоту лица твоего: ⁵⁵ мзда блужения твоего в недрех твоих, сего ради воздаяние приимеши. ⁵⁶ Якоже сотвориши избранным моим, рече Господь, тако сотворит тебе Бог и предаст тя во злая: ⁵⁷ и чада твоя гладом погибнут, ты же мечемъ падеши, и гради твои сокрушатся, и вси твои в поли оружием падут: ⁵⁸ и иже суть в горах, гладом погибнутъ и ясти будут мяса своя от глада хлеба и кровь пити от жажды воды: ⁵⁹ неблагополучна чрез моря приидеши и паки приимеши злая, ⁶⁰ и в прехождении поразят град избиенный, и искоренят некую часть земли твоея, и часть славы твоея истребят, паки возвращающеся къ вавилону превращенному: ⁶¹ и разорена будеши им яко хврастие, и тии будут тебе аки огнь, ⁶² и пожрут тя и грады твоя, землю твою и горы твоя, и вся дубравы твоя и древеса плодоносная огнем пожгут, ⁶³ сыны твоя в пленение поведут, и дани твоя в корысть возмут, и славу лица твоего истребят.