¹ И отвеща ко мне и рече: мерящь мери время в себе самем: и будет, повнегда увидиши, егда прейдет часть некоторая знамений, яже предречена суть, ² тогда уразумееши, яко то самое есть время, в неже начнет вышний посещати век, иже от него сотворен бысть: ³ и егда узрится в веце зыбание местъ и людий смущение, ⁴ тогда уразумееши, яко о сих глаголаше вышний от дний, иже быша пред тобою от начала: ⁵ якоже бо все, еже сотворено есть въ веце, начало имать, тако и скончание, и скончание есть явлено: ⁶ тако и вышняго времена начала имеют явленна в чудесех и силах, и скончания в деянии и знамениих: ⁷ и будет, всяк иже спасется и иже возможетъ избежати делами своими и верою, еюже веровасте, ⁸ останется от предреченных бед и узритъ спасние мое на земли моей и в пределех моих, яко освятих мене от века: ⁹ и тогда умилятся, иже ныне отступиша от путий моих, и в мучениих пребудут тии, иже отвергоша я в презорстве: ¹⁰ иже бо не познаша мя, живуще благодеяния получивше, ¹¹ и иже возненавидеша закон мой, егда еще бяху имеюще свободу и егда еще бяше им отверсто покаяния место, не уразумеша, но уничижиша, ¹² сим подобает по смерти в мучении познати: ¹³ ты убо ктому не буди любопытлив, како нечестивии мучитися будут, но испытуй, како праведнии спасутся, и ихже век, и ради которыхъ век, и когда. ¹⁴ И отвещах и рекох: ¹⁵ древле глаголах и ныне глаголю и после возглаголю, яко множае суть, иже погибнут, нежели иже спасутся, якоже умножаются волны над каплю. ¹⁶ И отвеща ко мне и рече: ¹⁷ какова нива, такова и семена, и каковы цвети, таковы и пестроты, и каков делатель, таково и дело, каков земледелец, таково и земледелство, понеже время бяше века: ¹⁸ и ныне егда бых уготовляющь тем, иже ныне суть, прежде неже бысть век, въ немже бы обитали: и никтоже противу рече мне: ¹⁹ тогда бо всяк, и ныне творец в мире семъ уготованнем, и в жатве неоскудевающей, и в законе неизследимем растлени суть нравы своими: ²⁰ и разсмотрих век, и се, бяше беда ради помышлений, яже в нем приидоша: ²¹ и видех, и простих ему зело, и сохранихъ мне ягоду от грозда и саждение от колена многа: ²² да погибнет убо множество, еже без вины рождено есть, и да сохранится ягодица моя и насаждение мое, еже великим трудомъ соверших: ²³ ты же, аще и еще спустиши седмь дний инех, но да не постишися в них, ²⁴ пойдеши на поле цветное, идеже дом несть создан, и снеси токмо от цветов полевых, и мяса да не вкусиши, и вина не пиеши, но токмо цветы: ²⁵ молися вышнему непрестанно, и прииду и возглаголю с тобою. ²⁶ И идох, якоже рече мне, на поле, еже зовется ардаф, и седох тамо в цветех, и от трав селных ядох, и бысть ми пища их в сытость. ²⁷ И бысть по седмих днех, и аз лежахъ на сене, и сердце мое паки смущашеся, якоже прежде. ²⁸ И отверзошася уста моя, и начах глаголати пред вышним и рекох: ²⁹ о, Господи! тя нам показуяй показался еси отцем нашим в пустыни непроходней и неплодней, егда бяху исходяще от египта, ³⁰ и глаголющь рекл еси: ты, израилю, послушай мя, и семя иаковле, вонми словесем моим: ³¹ се бо, аз сею закон мой, и сотворитъ в вас плод, и прославитеся в нем во век: ³² ибо отцы ваши приемлюще закон не сохраниша и законная моя не соблюдоша, и бысть плод закона неродящь: ниже бо можаше, понеже твой бе: ³³ зане, иже прияша, погибоша не сохраняюще, еже в них сеяно бысть: ³⁴ и се, обычай есть, да егда прииметъ земля семя, или корабль море, или сосудъ некий пищу или питие: егда будет повреждено то, в немже сеяно есть, или то, в немже поставлено есть, ³⁵ купно и то, еже насеяно или поставлено есть, или яже прията суть, истребляются, и восприятая уже не пребывают пред нами: нам же не тако сотворено бысть: ³⁶ мы бо, иже закон прияли есмы, согрешающе погибохом, и сердце наше, еже восприя его: ³⁷ яко закон не погибе, но пребывает во своемъ труде. ³⁸ И егда глаголах сия в сердцы моем, воззрех очима моима и видех жену в десней стране, и се, сия рыдаше и плакаше со гласомъ великим и душею боляше зело, и одеяние ея раздрано, и пепел на главе ея. ³⁹ И оставих помышления, в которых быхъ мысля, и обратихся к ней ⁴⁰ и рекох ей: о чем плачеши, и что болиши душею? ⁴¹ И рече ко мне: остави мя, господи мой, да восплачу себе и приложу болезни, яко зело огорчихся душею и смирена есмь зело. ⁴² И рекох ей: что страждеши? рцы ми. И рече ко мне: ⁴³ неплодна бых аз раба твоя и не родих, имеющи мужа лет тридесять: ⁴⁴ аз бо на всяк час и на всяк день, и лет сих тридесять молюся вышнему день и нощь: ⁴⁵ и бысть, по тридесятих летех услыша мя Бог рабу твою, и виде смирение мое, и внят скорбению моему, и даде мне сына: и ублажихся о нем зело аз и муж мой и вси граждане мои, и почтихом зело всесильнаго: ⁴⁶ и вскормих его с трудом великим: ⁴⁷ и бысть, егда возрасте и прииде пояти жену, сотворих день пирный.