¹ И рече ко мне: от начала круга земнаго и прежде основания исходов века, и прежде неже быша дышуще собрания ветровъ ² и прежде неже возшумеша гласи громнии, и прежде неже возсияша светлости блистаний и прежде неже утвердишася основания райская, ³ и прежде неже видени быша краснии цвети и прежде неже укрепишася силы подвиженыя, и прежде неже собрашася безчисленная воинства ангелская ⁴ и прежде неже вознесошася высоты воздушныя, и прежде нежели наименовахуся меры твердей и прежде нежели возгорешася пещи в сионе, ⁵ и прежде неже изследована быша настоящая лета и прежде неже отчуждишася сих, иже ныне согрешают, начинания, и прежде неже назнаменани быша тии, иже веру сокровиществоваша: ⁶ тогда аз помыслих, и сотворена суть чрез мене единаго, а не чрез иного, и конецъ будет мною, а не иным. ⁷ И отвещах и рекох: кое будет разделение времен? или когда первому конец, а другому начало? ⁸ И рече ко мне: от авраама даже до исаака, егда рождени суть от него иаков и исав, рука иаковля держаше от начала пяту исавову: ⁹ конец бо века сего исав, а другаго начало иаков: ¹⁰ человека рука между пятою и рукою, иного не ищи, ездро. ¹¹ И отвещах и рекох: о, владыко Господи, аще обретох благодать пред очима твоима, ¹² молю тя, да покажеши рабу твоему конец знамений твоих, ихже часть показал еси мне нощи прешедшия. ¹³ И отвеща и рече ми: востани на ноги твоя и услыши глас исполнен шума: ¹⁴ и будет аки колебание, а не поколеблется место, на немже стоиши: ¹⁵ сего ради, егда глаголет, ты не ужасайся, ибо о концы слово и основание земли разумеется: ¹⁶ понеже о сих вещех слово, трясется и колеблется: весть бо, яко конец их имать изменитися. ¹⁷ И бысть егда слышах, востах на нозе мои и слышах: и се, глас глаголющь, и шумъ его яко шум вод многих. ¹⁸ И рече: се, дние грядут, и будет, внегда приближатися начну, да посещу обитающих на земли, ¹⁹ и егда искати начну от сих, иже неправедно повредиша неправдою своею, и егда исполнится смирение сионе, ²⁰ и егда назнаменается век, иже начинаетъ преходити, сия знамения сотворю: книги разгнутся пред лицем тверди, и вси узрят вкупе, ²¹ и единолетнии младенцы возглаголют гласы своими, и чреватыя недозрелых родят младенцев, триех и четырех месяцей, и поживут и воздвижутся: ²² и абие явятся места насеянная ненасеяна, и полная хранилища внезапу обрящутся праздна: ²³ и труба вострубит с шумом, юже егда вси услышат, абие ужаснутся: ²⁴ и будет в то вре м, вооружатся приятеле на приятелей аки врази, и ужаснется земля с ними, и жилы источников станут и не стекутъ в часех триех: ²⁵ и будет, всяк, иже оставлен будет от всех сих, имиже предрекох тебе, той спасется и узрит спасние мое и конец века вашего: ²⁶ и узрят, иже прияти суть людие, иже смерти не вкусиша от рождения своего, и пременится сердце обитающих и обратится в чувство иное: ²⁷ загладитбося лукавое, и погасится лесть, ²⁸ процветет же вера, и победится растление, и явится истина, яже без плода бяше дни толики. ²⁹ И бысть, егда ми глагола, и се, тихо смотрехъ нань, пред нимже стоях, ³⁰ и рече ко мне сия: приидох к тебе показати время будущия нощи: ³¹ аще убо паки помолишися и паки попостишися седмь дний, паки тебе возвещу от сих болшия вещи, в день в оньже слышах: ³² слышан бо есть глас твой пред вышним: виде бо крепкий исправление твое и провиде чистоту, юже от юности твоея имел еси, ³³ и сего ради посла мя показати тебе вся вещи сия и рещи тебе: дерзай и не бойся, ³⁴ и не тщися с первыми времены мыслити суетная, да не поспешиши от последних времен. ³⁵ И бысть по сих, и плакахся паки и такожде постяхся седмь дний, да исполню три седмицы, яже речены суть мне. ³⁶ И бысть во осмую нощь, и сердце мое смущашеся паки во мне, и начах глаголати пред вышним: ³⁷ распалашеся бо дух мой зело, и душа моя унываше. ³⁸ И рекох: о, Господи! глаголя глаголал еси от начала сотворения в первый день (глаголющь): да будетъ небо и земля, и твое слово дело совершенно: ³⁹ и бысть тогда дух, и тма окрест ношашеся и молчание: шум гласа человеча еще не бе (сотворенъ) от тебе: ⁴⁰ тогда глаголал еси, да от сокровищ твоихъ произнесется свет светлый, имже бы явилося дело твое. ⁴¹ И в день вторый создал еси дух тверди и повелел еси ей, да разделит и разделение сотворит между водами, да часть некая выше уступит и часть вторая низу пребывает. ⁴² И в третий день повелел еси водамъ собратися в седмую часть земли, шесть же частей осушил и сохранил еси, еже бы пред тобою служили насеяны от Бога и устроены: ⁴³ слово бо твое изыде, и дело абие творяшеся: ⁴⁴ изыде бо абие плод множества безмернаго, и желания вкушения различная, и цвети видомъ непременным, и благовоние обоняния неизследованнаго, и в день третий сия сотворена суть. ⁴⁵ В четвертый же день повелел еси солнечней быти светлости, лунному свету и звезд расположению: ⁴⁶ и повелел еси им, да служат имущему быти созданному человеку. ⁴⁷ В пятый же день рекл еси седмей части, идеже бяше вода собрана, да произведет животная и летающая и рыбы, и тако творяшеся: ⁴⁸ вода нема и бездушна, яже Божиим мановениемъ повелевахуся, животная творяше, да от сего дивная твоя родове возвещают: ⁴⁹ и тогда сохранил еси две души: имя единей назвал еси енох, и имя вторей назвал еси левиафам, ⁵⁰ и разлучил еси я едино от другаго: не бо можаше седмая часть, идеже бяше вода собрана, вместити их: ⁵¹ и дал еси еноху едину часть, яже осушена есть в третий день, да обитаетъ на ней, идеже суть гор тысяща: ⁵² левиафаму же дал еси седмую часть мокрую и сохранил еси ю, да будет в снедь, имже хощеши и когда хощеши. ⁵³ В шестый же день повелел еси земли, да сотворит пред тобою скоты и звери и гады, ⁵⁴ и свыше сих (сотворил еси) адама, егоже поставил еси вожда и князя над всеми сотворенными, яже сотворил еси, и от него родимся мы вси, ихже избрал еси люди. ⁵⁵ Сия же вся рекох пред тобою, Господи, яко ради нас создал еси век: ⁵⁶ прочия же языки от адама рождены, реклъ еси оныя ничтоже быти: яко слине уподоблени суть, и яко капление от сосуда уподобилъ еси множество их: ⁵⁷ и ныне, Господи, се, тии языцы, иже ни во чтоже вменени суть, начаша владети нами и пожирати нас: ⁵⁸ мы же людие твои, ихже нарекл еси первенцемъ единородным возлюбленным твоим, предани есмы в руки их: ⁵⁹ и аще ради нас сотворен бысть век, вскую достояния не одержим с веком? доколе сия (будутъ)?