¹ Книга ездры пророка вторая, сына сараиева, сына азариева, сына елкиева, сына саданиева, сына садокова, сына ахитова, ² сына ахиева, сына финеесова, сына елиева, сына америева, сына асиелева, сына маримофова, сына арнаева, сына озиева, сына ворифова, сына ависеева, сына финеесова, сына елеазарова, ³ сына ааронова от колена левиина, иже бысть юзником в земли мидстей, в царство артаксеркса царя персскаго. ⁴ И бысть слово Господне ко мне, сице глаголющее: ⁵ иди и возвести людем моим злая дела их и сыном их лукавствия, яже противу мене сотвориша, да возвестят сыном сыновъ своих, ⁶ яко греси родителей их возрастоша в них, забывше бо мене, пожроша богом чуждим: ⁷ еда не аз изведох их из земли египетския из дому работы? тии же прогневаша мя и советы моя уничижиша: ⁸ ты же остризи власы главы твоея и верзи на них вся злая, понеже не послушаша закона моего, людие суть ненаказанни: ⁹ доколе терплю им, имже толикая благодеяния сотворих? ¹⁰ низложих ради их множество царей и поразихъ фараона с людьми его и со всеми вои его: ¹¹ вся языки от лица их погубих, и на востоце двух стран людий, тирских и сидонских, разсыпах, и побих всех врагов их. ¹² Ты же глаголи к ним сице: тако глаголет Господь: ¹³ аз вы преведох сквозе море и уготовахъ вам путь благ из начала, дах вам моисеа вожда и аарона во иереа, ¹⁴ дах вам свет во столпе огнене и сотворих в вас чудеса велия: вы же мене забысте, рече Господь. ¹⁵ Тако глаголет Господь вседержитель: крастеле быша вам во знамение, дах вам полки в защищение, вы же и тамо роптасте ¹⁶ и не радовастеся о имени моем, о победе врагов ваших, но роптасте даже и доныне: ¹⁷ где суть благодеяния, яже сотворих вам? не в пустыни ли, егда возалкасте, возописте ко мне ¹⁸ глаголюще: чесо ради нас в пустыню сию привел еси погубити нас? лучше нам бе работати египтяном, нежели умрети в пустыни сей: ¹⁹ аз ужалехся стенаний ваших и дахъ вам манну в пищу, хлеб ангелскии ядосте: ²⁰ егда возжаждасте, не разсекох ли камене, и потекоша воды в сытости, зноя ради листвиемъ древес вас покрывах: ²¹ разделих вам земли обилны, хананеовъ и ферезеов и филистимлян от лица вашего извергох: что сотворю вам ктому, глаголет Господь? ²² Сия глаголет Господь вседержитель: егда в пустыни бесте на реце аморрейсте жаждуще и хуляще имя мое, ²³ не огнь вам за хуления дах, но вложивъ древо в воду, сладку сотворих реку: ²⁴ что тебе сотворю, иакове? не восхотелъ еси послушати, иудо: преселюся ко иным языкомъ и дам им имя мое, да соблюдают законы моя: ²⁵ понеже остависте мя, и аз вас оставлю: просящих вас от мене милости не помилую: ²⁶ егда призовете мя, аз не услышу вы, осквернисте бо руце ваши кровию, и нозе ваши скоры суть во еже сотворити человекоубийства: ²⁷ не яко мене остависте, но вас самих, глаголет Господь. ²⁸ Сия глаголет Господь вседержитель: еда азъ вас не молих, яко отец сыны и яко мати дщерей и яко доилица отрочат своих, ²⁹ да будете ми в люди, и аз вам в Бога, и вы мне в сыны, и аз вам во отца: ³⁰ тамо вас собирах, якоже кокош птенцы своя под криле свои: ныне же что сотворю вам? отвергу вы от лица моего: ³¹ приношение егда мне принесете, отвращу лице мое от вас: дни бо праздничныя ваша и новом(с)чия и обрезания отвергох: ³² аз послах отроки моя пророки к вам, ихже емше убисте, и растнисте телеса их, ихже крове взыщу, глаголет Господь. ³³ Сия глаголет Господь вседержитель: дом ваш пустъ есть, помещу вас яко ветр плевы, ³⁴ и сынове порождения не сотворят, понеже заповедь мою презреша, и еже зло есть предо мною, сотвориша: ³⁵ предам домы ваша людем грядущим, иже мя не слышавше уверуют: имже знамений не явих, сотворят, яже повелех, ³⁶ пророков не видеша, а воспомянут беззакония своя: ³⁷ засвидетелствую людий грядущих благодать, ихже отроцы веселятся с радостию, мене не видяще очесы плотскими, но духом верующе, яже рекох: ³⁸ и ныне, брате, смотри, кая слава, и виждь люди приходящия от востока, ³⁹ имже дам началство авраамле, исааково и иаковле, и осиино и амосово, и михеино и иоилево, и авдиино и ионино, ⁴⁰ и наумово и аввакумово, софониино, аггеево, захариино и малахиино, иже и ангел Господень наречеся.