¹ Пророчество словесе Господня на израиля, глаголет Господь, прострый небо и основаяй землю и созидаяй дух человека в нем: ² се, аз полагаю Иерусалима яко преддверия движимая всем людем окрест, и во иудеи будет обседение на Иерусалима: ³ и будет в день оный, положу Иерусалима камень попираемый всеми языки: всяк попираяй его ругаяся поругается, и соберутся нань вси языцы земли. ⁴ В день он, глаголет Господь вседержитель, поражу всякаго коня во ужас и всадника его в безумие: и на дом иудов отверзу очи мои и вся кони людий поражу во ослепление. ⁵ И рекут тысящницы иудины вси в сердцах своих: обрящем себе живущыя во Иерусалиме о Господе вседержители Бозе их. ⁶ В день он положу тысящники иудины яко главню огненну в дровах и яко свещу огненну в стеблии, и поядят одесную и ошуюю вся люди окрест: и населится Иерусалим еще по себе во Иерусалиме: ⁷ и спасет Господь селения иудова якоже исперва, яко да не величается похвала дому давидова и величания живущих во Иерусалиме на иуду. ⁸ И будет в день он, защитит Господь живущих во Иерусалиме: и будет немощный в них в той день яко давид, а дом давидов яко дом Божий, якоже ангел Господень пред ними. ⁹ И будет в день он, взыщу изяти вся языки грядущыя на Иерусалим, ¹⁰ и излию на дом давидов и на живущыя во Иерусалиме дух благодати и щедрот, и воззрят нань, егоже прободоша, и восплачутся о нем плаканием яко о возлюбленнем, и поболят о нем болезнию яко о первенце. ¹¹ В день он возвеличится плачевопльствие во Иерусалиме, яко плачевопльствие ададримона на поли магедоне. ¹² И восплачется земля по племеном племеном: колено о себе, и жены их о себе: колено дому давидова о себе и жены их о себе: ¹³ колено дому нафанова о себе, и жены их о себе: колено дому левиина о себе, и жены их и себе: колено симеоне о себе, и жены их о себе: ¹⁴ вся прочая колена, колено и колено о себе, и жены их о себе.