¹ И обратихся и возведох очи мои и видех, и се, четыри колесницы исходящыя из средины двоих гор, горы же те беша горы медяны: ² в колеснице первей кони рыжы, и в колеснице вторей кони врани, ³ и в колеснице третией кони бели, и в колеснице четвертей кони пестри скори. ⁴ И отвещах и рех ко ангелу глаголющему во мне: что суть сия, господи? ⁵ И отвеща ангел глаголяй во мне и рече: сия суть четыри ветри небеснии, иже исходят предстати Господу всея земли. ⁶ В нейже беху кони врани, исхождаху на землю северскую, и белии исхождаху вслед их, и пестрии исхождаху на землю южную, ⁷ и скории исхождаху и озираху еже оыти землю. И рече: идите, обыдите землю. И обыдоша землю. ⁸ И возопи и рече ко мне глаголя: се, исходящии на землю северскую упокоиша ярость мою на земли северстей. ⁹ И бысть слово Господне ко мне глаголя: ¹⁰ приими, яже от плена от князей и от ключимых его и от разумевших его, и внидеши ты в день он в дом иосии софониина, грядущаго от вавилона, ¹¹ и приимеши сребро и злато, и сотвориши венцы, и возложиши на главу иисусу иоседекову, иерею великому, ¹² и речеши к нему: сице глаголет Господь вседержитель: се, муж, восток имя ему, и под ним возсияет, и созиждет храм Господень: ¹³ и той приимет добродетель, и сядет и возобладает на престоле своем, и будет иерей одесную его, и совет мирен будет между обема, ¹⁴ а венец будет терпящым и ключимым ему и разумевшым его, и в благодать сыну софониину, и в псалом во храме Господни: ¹⁵ и издалеча от сих приидут и созиждут во храме Господни, и уразумеете, яко Господь вседержитель посла мя к вам: и будет, аще слушающе послушаете гласа Господа Бога вашего.