¹ И возведох очи мои и видех, и се, муж, и в руце его уже землемерно. ² И рех к нему: камо грядеши ты? И рече ко мне: размерити Иерусалима, еже видети, колика широта его есть и колика долгота. ³ И се, ангел глаголяй во мне стояше, и ин ангел исхождаше во сретение ему ⁴ и рече к нему глаголя: тецы и рцы к юноши оному глаголя: плодовито населится Иерусалим от множества человеков и скотов, иже посреде его: ⁵ и аз буду ему, глаголет Господь, стена огнена окрест и в славу буду посреде его. ⁶ о, о, бежите от земли северныя, глаголет Господь, зане от четырех ветров небесных соберу вы, глаголет Господь: ⁷ в сион спасайтеся, живущии во дщери вавилонстей. ⁸ Зане сице глаголет Господь вседержитель: вслед славы посла мя на языки пленившыя вас, зане касаяйся вас яко касаяйся в зеницу ока его: ⁹ зане, се, аз наношу руку мою на ня, и будут корысть работающым им, и уразумеете, яко Господь вседержитель посла мя. ¹⁰ Красуйся и веселися, дщи сионя, зане, се, аз гряду и вселюся посреде тебе, глаголет Господь. ¹¹ И прибегнут языцы мнози ко Господу в той день и будут ему в люди и вселятся посреде тебе, и уразумееши, яко Господь вседержитель посла мя к тебе. ¹² И наследит Господь иуду, участие свое на земли святей, и изберет еще Иерусалима. ¹³ Да благоговеет всяка плоть от лица Господня, яко воста из облак святых своих.