¹ В двадесять четвертый день месяца шестаго, во второе лето, при дарии цари, ² в седмый месяц, в двадесять первый месяца, глагола Господь рукою аггеа пророка глаголя: ³ рцы ныне к зоровавелю салафиилеву от колена иудова и ко иисусу сыну иоседекову, иерею великому, и ко всем прочиим людем, глаголя: ⁴ кто от вас, иже виде храм сей в славе его прежней? и како вы видите его ныне якоже не суща пред вами? ⁵ И ныне укрепляйся, зоровавелю, глаголет Господь, и укрепляйся, иисусе, сыне иоседеков, иерею великий, и да укрепляются вси людие земли, глаголет Господь (вседержитель), и творите: зане аз с вами есмь, глаголет Господь вседержитель: ⁶ слово, еже завещах с вами, егда исходисте из земли египетския, и дух мой настоит посреде вас: дерзайте, зане сице глаголет Господь вседержитель: ⁷ еще единою аз потрясу небом и землею, и морем и сушею, ⁸ и сотрясу вся языки, и приидут избранная всех языков: и исполню храм сей славы, глаголет Господь вседержитель. ⁹ Мое сребро и мое злато, глаголет Господь вседержитель: ¹⁰ зане велия будет слава храма сего последняя паче первыя, глаголет Господь вседержитель: и на месте сем дам мир, глаголет Господь вседержитель, и мир души в снабдение всякому зиждущему, еже возставити церковь сию. ¹¹ В двадесять четвертый девятаго месяца, во второе лето при дарии цари, бысть слово Господне ко аггею пророку глаголя: ¹² сице глаголет Господь вседержитель: вопроси иереев закона глаголя: ¹³ аще приимет человек мясо свято вскрай ризы своея, и коснется край ризы его хлеба, или варива, или вина, или масла, или всякаго брашна, еда освятится? И отвещаша священницы и реша: ни. ¹⁴ И рече аггей: аще прикоснется оскверненый или нечистый душею всякому сих, еда осквернится? И отвещаша иерее и реша: осквернится. ¹⁵ И отвеща аггей и рече: сице людие сии, и сице язык сей предо мною, глаголет Господь, и сице вся дела рук их: и иже аще приближится тамо, осквернится за приятия их утренняя, поболят от лица лукавств своих, и ненавидесте во вратех обличающаго. ¹⁶ И ныне положите на сердцах ваших от дне сего и выше, прежде неже положити камень на камени в храме Господни. ¹⁷ Кто бысте, егда влагасте в мех ячмене двадесять сат, и быша ячмене десять сат? и входисте в подточилие черпати пятьдесят мер, и быша двадесять. ¹⁸ Поразих вы неплодием и ветротлением и градом вся дела рук ваших, и не обратистеся ко мне, глаголет Господь. ¹⁹ Устройте же сердца ваша от сего дне и далее, от двадесять четвертаго дне девятаго месяца и от дне, в оньже основася церковь Господня: положите в сердцах ваших, ²⁰ аще еще познается на гумне, и аще еще виноград, и смокви, и яблонь, и древа масличная не творящая плода? от дне сего благословлю. ²¹ И бысть слово Господне вторицею ко аггею пророку в двадесять четвертый месяца глаголя: ²² рцы к зоровавелю сыну салафиилеву от колена иудова глаголя: аз потрясу небом и землею, и морем и сушею, ²³ и превращу престолы царей, и потреблю силу царей языческих, и превращу колесницы и всадники, и снидут кони и всадницы их, кийждо во оружии на брата своего. ²⁴ В той день, глаголет Господь вседержитель, прииму тя, зоровавелю салафиилев, рабе мой, глаголет Господь, и положу тя яко печать, понеже тя избрах, глаголет Господь вседержитель.