¹ Яко се, аз во дни тыя и во время оно, егда возвращу пленники иудины и Иерусалимли, ² и соберу вся языки, и сведу я на юдоль иосафатову, и разсуждуся с ними ту о людех моих и о наследии моем израили, иже разсеяшася во языцех, и землю мою разделиша. ³ И на люди моя вергоша жребия, и даша отрочища блудницам, и отроковицы продаяху на вине и пияху. ⁴ И что вы мне, тире и сидоне и вся галилеа иноплеменников? еда воздаяние вы воздаете мне? или памятозлобствуете вы на мя? Остро и быстро воздам воздаяние ваше на главы вашя, ⁵ понеже сребро мое и злато мое взясте, и избранная моя и добрая внесосте в требища ваша, ⁶ и сыны иудины и сыны Иерусалимли продасте сыном еллинским, яко да ижденете я от предел их. ⁷ И се, аз возставлю я от места, в неже продасте я тамо, и воздам воздаяние ваше на главы вашя: ⁸ и отдам сыны вашя и дщери вашя в руце сынов иудиных, и продадят я в плен во страну далече сущу, яко Господь глагола. ⁹ Проповедите сия во языцех, освятите рать, возставите сечцы, приведите и восходите, вси мужие воинстии, ¹⁰ разсецыте рала ваша на мечы и серпы вашя на копия: немощный да глаголет, яко могу аз: ¹¹ совокупляйтеся и входите, вси языцы окрест, и соберитеся ту: кроткий да будет храбр. ¹² Да востанут и взыдут вси языцы на юдоль иосафатову, яко тамо сяду разсудити вся языки яже окрест. ¹³ Испустите серпы, яко предстоит оымание винограда: внидите, топчите, яко исполнь точило, изливаются подточилия, яко умножишася злобы их. ¹⁴ Гласи прогласишася на поли судебнем, яко близ день Господень на юдоли судебней. ¹⁵ Солнце и луна померкнут, и звезды скрыют свет свой. ¹⁶ Господь же от сиона воззовет и от Иерусалима даст глас свой, и потрясется небо и земля: Господь же пощадит люди своя и укрепит (Господь) сыны израилевы. ¹⁷ И увесте, яко аз Господь Бог ваш, вселяяся в сионе в горе моей святей: и будет Иерусалим свят, и иноплеменницы не пройдут сквозе его ктому. ¹⁸ И будет в той день, искаплют горы сладость, и холми источат млеко, и вси источницы иудины источат воды, и источник от дому Господня изыдет и напоит водотечь сития. ¹⁹ Египет в погибель будет, и идумеа в поле погибели будет за озлобление сынов иудиных, понеже пролияша кровь праведную на земли своей: ²⁰ иудеа же во веки населится, и Иерусалим в роды родов. ²¹ И взыщу крови их и не обезвиню: и Господь вселится в сионе.