¹ Виноград благолозен израиль, плод обилен его: по множеству плодов его умножи требища, по благотам земли его возгради капища. ² Разделиша сердца своя, ныне погибнут: сам раскопает требища их, сокрушатся кумиры их. ³ Темже ныне рекут: несть царя в нас, яко не бояхомся Господа: царь же что сотворит нам? ⁴ Глаголяй словеса извинения ложная завещает завет: прозябнет суд аки троскот на лядине селней. ⁵ У телца дому онова возобитают живущии в самарии, яко плакашася людие его о нем: и якоже разгневаша его, порадуются о славе его, яко преселися от них. ⁶ И связавше его, во ассирию отведоша в дар царю иариму: в дар ефрем приимется, и усрамится израиль о совете своем. ⁷ Отверже самариа царя своего, аки хврастие на лицы воды. ⁸ Извергутся требища онова согрешения израилева, терние и волчец возникнут на требищих их: и рекут к горам: покрыйте ны: и холмом: падите на ны. ⁹ Отнележе холми, согреши израиль: тамо сташа: не постигнет их на холме рать, на чада неправды. ¹⁰ Прииде наказати их по желанию моему: и соберутся людие на ня, внегда наказатися им во двою неправдах своих. ¹¹ Ефрем юница наученая, еже любити прение: аз же найду на доброту выи ея, наступлю на ефрема, умолчу о иуде, укрепится себе иаков. ¹² Сейте себе в правду, соберите плод живота, просветите себе свет ведения, дондеже время, взыщите Господа, дондеже приидут вам жита правды. ¹³ Вскую премолчасте нечестие, и неправды его оымасте, изядосте плод лжив? яко уповал еси на оружие твое, во множестве силы твоея. ¹⁴ И востанет пагуба в людех твоих, и вся ограды твоя погибнут, якоже (погибе) князь саламан от дому иеровоамля, во дни ратны матерь о чада разбиша: ¹⁵ тако сотворю вам, доме израилев, от лица неправды злоб ваших.