¹ В скорби своей утреневати будут ко мне, глаголюще: идем и обратимся ко Господу Богу нашему, ² яко той поби ны, и изцелит ны: уязвит, и уврачует ны: ³ изцелит ны по двою дню, в день третий воскреснем и живи будем пред ним, и увемы: поженем, еже уведети Господа: яко утро готово обрящем его, и приидет нам яко дождь ранний и поздный земли. ⁴ Что ти сотворю, ефреме? что ти сотворю, иудо? милость бо ваша яко облак утренний и яко роса рано падающая. ⁵ Сего ради пожах пророки вашя, убих я словесем уст моих, и суд мой яко свет изыдет. ⁶ Зане милости хощу а не жертвы, и уведения Божия, нежели всесожжения. ⁷ Сии же суть яко человек преступаяй завет: тамо презреша мя. ⁸ Галаад град делаяй суетная, мутяй воду, ⁹ а крепость твоя яко мужа морскаго разбойника: скрыша жерцы путь Господень, убиша сикиму, яко беззаконие сотвориша. ¹⁰ В дому израилеве видех грозная: тамо блужение ефремово: осквернися израиль и иуда. ¹¹ Начни оымати виноград себе, егда возвращу пленение людий моих.