¹ Слышите сия, жерцы, и вонмите, доме израилев, и доме царев, внушите, понеже к вам есть суд: яко пругло бысте стражбе, и якоже мрежа распростерта на итавирии, ² юже ловящии лов поткнуша, аз же наказатель вам: ³ аз познах ефрема, и израиль не отступи от мене, зане ныне соблуди ефрем, и осквернися израиль: ⁴ не положиша помышлений своих, еже возвратитися к Богу своему, яко дух блужения есть в них, и Господа не уведеша. ⁵ И смирится укоризна израилева в лице ему, и израиль и ефрем изнемогут в неправдах своих, изнеможет же и иуда с ними. ⁶ Со овцами и телцы пойдут взыскати Господа и не обрящут его, уклонися бо от них. ⁷ Яко Господа оставиша, яко чада чужда породиша себе: ныне пояст я ржа, и причастия их. ⁸ Вострубите трубою на холмех, возгласите на высоких, проповедите в дому онове, ужасеся вениамин, ⁹ ефрем в пагубу бысть во дни наказания: в племенех израилевых показах верная. ¹⁰ Быша князи иудины яко прелагающе пределы: на ня излию яко воду гнев мой. ¹¹ Соодоле ефрем соперника своего, попра суд, яко нача ходити вслед суетных. ¹² Аз же яко мятеж ефремови и яко остен дому иудину. ¹³ И виде ефрем немощь свою и иуда болезнь свою: и иде ефрем ко ассирием и посла послы ко царю иариму: и той не возможе изцелити вас, и не престанет от вас болезнь. ¹⁴ Зане аз есмь яко панфирь ефремови и яко лев дому иудину: и аз восхищу, и пойду, и возму, и не будет изимаяй: ¹⁵ пойду и возвращуся на место свое, дондеже погибнут, и взыщут лица моего.