¹ И введе мя во двор внешний на востоки, прямо врат яже к северу, и введе мя (внутрь), и се, преград пять держащыяся прочаго и держащыяся предела к северу, ² противу лица ста лактей долгота к северу, а широта пятьдесят лактей, ³ расписаны якоже врата двора внутренняго, и якоже междустолпия внешняго двора чинорасположены, прямоличны притворы три. ⁴ И прямо преградам проход десяти лактей в широту, во внутренняя пути единаго лактя на сто лактей долгота, и двери их к северу. ⁵ И проходи горничнии такожде, яко изницаше междустолпие из него, от долнаго междустолпия, и разстояние: сице междустолпие и разстояние, ⁶ и сице притворы: понеже трегубы бяху и столпов не имеша, якоже столпи преград: того ради изницаху из нижних и средних от земли. ⁷ И свет внеуду, якоже преграды двора внешняго, зрящыя противу преградам, яже к северу, долгота пятидесяти лактей. ⁸ Зане долгота преград зрящих во двор внешний бяше пятидесяти лактей, и тыя суть прямоличны тем: все же (бе) ста лактей. ⁹ Двери же преград тех входа, иже на востоки, еже входити ими от двора внешняго, ¹⁰ по свету сущаго в начале прохода: и к югу на лице юга, и прямо прочему, и прямо разделения, и преграды, ¹¹ и проход противу лицу их, по мерам преград яже к северу и по долготе их и по широте их, и по всем исходом их и по всем вращением их, и по светом их и по дверем их, ¹² преград яже к югу, и по дверем от начала прохода аки к свету разстояния трости, и на восток еже входити ими. ¹³ И рече ко мне: преграды, яже к северу, и преграды, яже к югу, сущыя противу лицу разстояний, сия суть преграды святаго, в нихже ядят жерцы сынове садуковы, иже приступают ко Господеви, святая святых, и тамо положат святая святых и жертву, и яже за грехи и яже за неведение, понеже место свято есть. ¹⁴ Да не входят тамо, кроме жерцев, и да не изходят от святаго во двор внешний, яко да присно святи будут приносящии, и да не прикасаются ризам их, в нихже служат, понеже свята суть, но да облекутся в ризы ины, егда прикасаются людем. ¹⁵ И совершися размерение храма внутрьуду. И изведе мя по пути врат зрящих на восток, и размери подобие храма окрест чинорасположением. ¹⁶ И ста созади врат зрящих на восток, и размери пять сот тростию мерною. ¹⁷ И обратися на север, и размери на лице севера лактей пять сот тростию мерною. ¹⁸ И обратися к морю, и размери на лице моря пять сот лактей тростию мерною. ¹⁹ И обратися на юг, и размери противу югу пять сот тростию мерною. ²⁰ Четыри страны тоюжде тростию: и расположи его, и ограду окрест ему, пять сот лактей (долготу) на восток, и пять сот лактей широту, еже разлучати между святыми и между предстением сущим в чинорасположении храма.